Доңға кен орнында жаңа компрессорлық қондырғы іске қосылды

Маңғыстау облысындағы Доңға кен орнында «Доңға 3-кезең» жобасының негізгі нысандарының бірі — жаңа компрессорлық қондырғысын қабылдау бойынша сынақ жұмыстары аяқталды. Бұл қондырғы өндірісті ұлғайту жағдайында инфрақұрылымның өткізу қуатын арттыруға мүмкіндік береді.

Биылғы І жартыжылдықта кен орнында мұнай өндіру көлемі 340 мың тонна болды, бұл жоспардан 7 мың тоннаға артық.

2024 жылдың қорытындысы бойынша 630 мың тонна мұнай өндірілді, биылға арналған жоспар — 649,3 мың тонна.

Жаңа қондырғы үш технологиялық модульден тұрады. Сығымдау компрессорының блогы газ қысымын арттыруға арналған. Отын газының компрессоры газды қысып, жұмыс істеп тұрған газ турбиналы электр станциясына беруді қамтамасыз етеді. Ал негізгі компрессор газ дайындау қондырғысына жіберер алдында оны қысады.

Іске қосу-баптау жұмыстарына компрессорлық қондырғыны өндіруші фирма Ariel мамандарымен бірге Siemens AG және Honeywell International Inc компанияларының өкілдері де қатысты.

Бұдан бұрын хабарлағанымыздай, «Dunga Operating GmbH» компаниясы («ҚазМұнайГаз» ҰК АҚ-ға жобадағы үлестің 60% тиесілі) тарихи өндірістік көрсеткішке қол жеткізді — Доңға кен орнында осы күнге дейін жинақталған мұнай өндіру көлемі 9 млн тоннаға жетті.