04 шілде 2019, 15:10 7019

Елордада Жекпе-жек сарайының құрылысы аяқталды

Бүгін Нұр-Сұлтан қаласында Жекпе-жек сарайының таныстырылымы өтті. Құрылысты "Самұрық-Қазына" ұлттық әл-ауқат қоры жүзеге асырды. Жобаның құны шамамен 19,5 млрд теңгені құрады. Жоба әкімшісі - "Samruk – Kazyna Construction" АҚ.

Бірегей ғимаратта жекпе-жектің барлық түрлерінен халықаралық жарыстар өтеді: бокс, күрес, дзюдо, ауыр атлетика және тағы басқа. Сондай-ақ, кешенде спортшылар жарысқа дайындалып, ем-сауықтыру шаралары қамтамасыз етіледі. Бұдан басқа, бұнда салауатты өмір салтын ұстанатын қарапайым тұрғындар спортпен шұғылдана алады.

"Кешен халықаралық спорт федерациясының стандарттары мен талаптарына сәйкес салынды. Ғимараттың құрылысы кезінде жылу беру, желдеру ауа баптау және бөлмені жарықтандырудың заманауи энергиялық тиімді жүйелер ұсынатын инновациялық инженерлік шешімдер қолданылды. Жекпе-жек сарайы ғимаратының бірегей үшбұрышты пішіні Қазақстанның бостандығы мен бірлігінің белгісі ретінде ұшатын қыран келбетін бейнелейді", - деді "Samruk-Kazyna Construction" АҚ сатып алу және пайдалану департаментінің директоры Дархан Мұсанов.

Көпсалалы сарайдың аумағы 32 мың шаршы метр, 5 мың көрерменге арналған. Кешен төрт қабаттан және бірнеше блоктан тұрады – аренадағы әмбебап жаттығу залы, жаттығу және спорттық-сауықтыру бөлмесі, сондай-ақ қонақ үй қарастырылған. Сонымен қатар, кешенде 25 метрлік жүзу бассейні, фитнес-орталық және шағын футбол алаңы да бар.