Ембі өндірісінің абыройы аласармайды

Ғасырлық тарихы бар, қамбаны «қара алтынмен» толықтырып жүрген Ембі өндірісінде еңбек ететін кәсіп иелерінің қызметіне қатысты арнайы дайындалған бейнероликпен шымылдығын ашқан шараға «Ембімұнайгаз» АҚ Бас директоры Сәбит Арынов қатысып, құттықтау лебізін жеткізді.

Кәсіби мереке барлық өндірістік-құрылымдық бөлімшелерде аталып өткенін жеткізген Сәбит Әбілдаұлы биылғы кәсіби мерекемен тұспа-тұс келген мерейлі даталарға да тоқталды. «Жайықмұнайгаз» МГӨ басқармасы, Прорва, С.Балғымбаев, Гран, Қисымбай, Шығыс Мақат кен орындарын мерейлі белестерімен құттықтады.

«Қазақ мұнайының қара шаңырағы – ғасырлық тарихы бар Ембі өндірісінің абыройын аласартпай, өндірістік көрсеткіштерді жақсарту жолында еңбек етіп жүрген әріптестеріміз бен алдыңғы буын ардагерлерді әрқашан мақтаныш тұтамыз, еңбектеріңіз үшін алғыс айтамыз. «Ембімұнайгаз» АҚ – үздіктер қатарынан көрініп жүрген Компания, соның дәлеліндей, былтырғы нәтижелер бойынша үздік салық төлеушілер қатарынан көрінді» деген Компания басшысы алдағы жоспарларды баяндап, мұнайшыларға ізгі тілегін жолдады.

Бұдан соң, салтанатты жиын марапаттау рәсіміне жалғасты. Бір топ қызметкерлер табысты еңбегі, қызметтегі жетістіктеріне орай, ҚР Энергетика министрлігінің «Мұнай-газ кешенін дамытуға қосқан үлесі үшін» медалі және «Мұнай-газ саласының еңбек сіңірген қызметкері» төсбелгісі, Министрліктің Алғыс хатының иегері атанды. Сонымен қатар, «Самұрық-Қазына» АҚ Құрмет грамотасы, «ҚазМұнайГаз» ҰК АҚ Құрмет грамотасы мен Естелік белгісін иеленген қызметкерлер сахна төрінде ұлығыланды. Компания басшысы «Ембімұнайгаз» АҚ Құрмет грамотасы мен Алғыс хат иелеріне де марапаттарын табыстады.

Салтанатты жиын соңы Дина Нұрпейісова атындағы академиялық қазақ ұлт аспаптар оркестрінің концертіне жалғасты. Қатысушылар назарына ұсынылған Soundtrack концерт көрермен көңілінен шығып, тамаша рухани демалыс сыйлады.