ЕМГ қызметкері Қор челленджі туралы: Еңбекке ынтамыз артты

«Ембімұнайгаз» АҚ-нан форумға жолдама алғандардың бірі келешектік даму және тәуекелдерді басқару департаментінің аналитигі Бибігүл Ерниязова шарадан алған әсерімен бөлісті:

– Челленджде физикалық, эмоционалды және зияткерлік бағыттар бойынша күніне 5 түрлі тапсырма берілді. «Самұрық-Қазына» қорында 84 мыңнан астам жас маман қызмет атқарады екен. Оның ішінде, 2000-ға жуық жас маман челленджге қатысып, ішінен 178-і барлық тапсырмаларды толық, соңына дейін орындап, әрі қарай Түркістан қаласында өтетін жастар форумына жолдама алдық.

Форумға шақырту алған 178 қатысушының 22- сі – «ҚазМұнайГаз» Ұлттық компаниясына қарасты еншілес компаниялардың жас мамандары. Олардың қатарында менімен бірге ембілік «Доссормұнайгаз» МГӨБ өндірісті жедел басқару қызметінің 1-ші санатты инженер технологы Жақсыкелді Жолдасқалиев, ұңғымаларды жерасты және күрделі жөндеу цехының инженер-технологы Ерлан Тасмағамбетов және ЕМГ басқару аппаратында қызмет ететін «ҚМГ-Құмкөл» ЖШС-нің IT маманы Мақсот Әбуғалиев болды.

Форумның алғашқы күні «Самұрық-Қазына» АҚ Қоғаммен байланыс, әлеуметтік-еңбек қатынастары және еңбекті қорғау жөніндегі басқарушы директоры Ғибрат Ауғанов жастарды құттықтап, жастармен бірге түрлі сайыстарға қатысып, өз тәжірибесімен бөлісті.

Келесі күні қатысушылар топтарға бөлініп, «Керуен сарайы» туристтік кешеніндегі этно-ауылға барып, қазақтың салт-дәстүрлерін ұлықтауға бағытталған арнайы танымдық квест ойындарына қатысты. Шара ұлттық құндылықтарды дәріптеуге бағытталғандықтан, «шаңырағымыз биік болсын» деген мақсатпен киіз үй тігіп, ұлттық тағамдар дайындаудан жарыс болды. Тарихи-танымдық сұрақтарға жауап беріп, «Асық ату», «Теңге ілу», «Арқан тарту», «Садақ ату» сияқты ұлттық ойындарды ойнап, өзара сайысқа түстік.

Форумның екінші кезеңінде Нобель сыйлығының лауреаты Джон Нэштың ақыл-ой теориялық ойыны ойналды. Ойынды жүргізген – ICF коуч, «SKY» «SpartoPro» тұлғалық даму орталығының тренері Айдар Басурманов. Екі күн қызыққа толы тұлғалық дамудан кейін стратегиялық сессия басталды. 4 сағаттық сессияның нәтижесінде «Jas Samuryq» жастарының логотипін, ұранын құрып, жас мамандарды біріктіретін құндылықтарды айқындап, ережелерді жасақтап, жастар саясатын дамыту бойынша стратегияны бекіттік.

Форумның үшінші күнінде «Самұрық-Қазына» АҚ қызметкерлері компанияның қазіргі жұмыстары бойынша қысқаша презентация жасап, өздерінің жетістікке жету жолымен бөлісті. Кеш соңында Қорға қарасты 12 компанияның жас мамандары өнер көрсетіп, концерттік бағдарламаға ұласты.

Форумның төртінші күні арнайы шақыртылған қонақ, ережесіз жекпе-жектен 3 дүркін әлем чемпионы Ардақ Назаровпен 3 сағаттық тағылымдық кездесу өтті.