Энергетика министрі Қаражанбастағы су тұщыту зауытының құрылысымен танысты

Министр жер қойнауын пайдаланушылардың басты міндеті – жер қойнауына ұқыпты қарау қажет екенін атап өтті.

«Біз әрқашан инвестиция тартудың, жаңа жұмыс орындарының ашылуын қолдаймыз, бірақ жер қойнауын игеру «менен кейін не болса, ол болсын» қағидаты бойынша емес, ұтымды жолмен жүргізілуі тиіс. Жер қойнауы Қазақстан Республикасының меншігі болып табылады және кез келген адам оған ұқыпты қарауы тиіс», – деді Нұрлан Ноғаев.

«Қаражанбасмұнай» АҚ Басқармасы делегацияны қабат суын тұщыту зауытының құрылыс барысымен таныстырды. Жаңа зауыт өңірдегі тұщы су тапшылығын жою бойынша маңызды жобалардың бірі болып табылады.

Зауыт қабат суын өңдеп және тұщытып, бу айдау әдісімен кен орны қабаттарының мұнай беруін арттыру үшін техникалық су ретінде пайдаланылатын болады. Қазіргі уақытта Қаражанбас күн сайын Астрахань-Маңғыстау су құбыры арқылы келетін 20 мың текше метр Еділ суын тұтынады. Су тұщыту зауытын іске қосу ҚБМ-ның сумен қамтамасыз ету мәселелерінде өз-өзіне жеткілікті болуына және Маңғыстау облысы халқының қажеттілігі үшін айтарлықтай су көлемін босатуға мүмкіндік береді.

Зауыт құрылысы 2019 жылдың қыркүйегінде басталды. Қуаты – көп сатылы сүзгілеу және кері осмос технологиясын қолданумен тәулігіне 17 000 м3 құрайтын болады. Бүгінгі таңда құрылыс жұмыстары қарқынды жүруде. Нысан 2021 жылдың бірінші тоқсанында падалануға беріледі деп жоспарланып отыр. Нұрлан Ноғаев бұл нысанның компания үшін ғана емес, жалпы өңір үшін де маңыздылығын атап өтті.

«Құрылыста отандық жабдық пен материалдарды пайдалану қажет. Су тұщыту зауыты және басқа да жаңа технологияларды енгізу компанияның тұрақты дамуына ықпал ететініне сенімдімін», – деп атап өтті Энергетика министрі.

Сондай-ақ, делегация бу генераторлық қондырғылары алаңына барды. Қаражанбас мұнайы тұтқырлығы мен тығыздығының жоғарылығымен ерекшеленетіні белгілі. Осыған байланысты оны алу үшін ылғал қаныққан буды өнімді қабатқа айдау түрінде бу-жылу әдісі қолданылады. Температураның жоғарылауымен мұнайдың тұтқырлығы мен тығыздығы төмендейді, бұл оның едәуір бөлігін жоғары шығаруға мүмкіндік береді. Өндірісті жаңғырту аясында биылғы жылы арнайы ҚБМ үшін әзірленген СПГУ-23 үлгісіндегі алты жаңа заманауи бу генераторы іске қосылды. Әрқайсысының өнімділігі тәулігіне температурасы 250-300 °с болатын 550 тонна буды құрайды.

Айта кету керек, компания алғаш рет отандық өнімді қолдау аясында «ЭкоЭкспресс Ақтөбе» ЖШС-мен Ақтау қаласында өндірісті ұйымдастырумен МПГУ-23 тн/сағ мобильді бу генераторларының 2 бірлігін жеткізуге шарт жасасты. Бу генераторлары сәтті іске қосылды.

Жұмыс сапарының қорытындысы бойынша министр іске асырылып жатқан жобаларға, халықаралық қауіпсіздік стандарттарын енгізуге, технологиялық үдерісті жаңғыртуға, сондай-ақ жұмысшылардың тұрмыстық және еңбек жағдайларын жақсарту бойынша атқарылып жатқан жұмыстарға оң баға берді.