ЖОО студенттері ҚТЖ-да тағылымдамадан өтеді

ҚТЖ-да “ЖАС ТЕМІР-2024” жас мамандарды дамыту бағдарламасы аясында Компанияда тағылымдамадан өту үшін іріктелген жоғары оқу орындарының теміржол мамандықтары түлектерімен кездесу өтті.

Кездесуде ҚТЖ адам ресурстарын басқару департаментінің өкілдері тағылымдаманың қалай өтетіні және жас мамандардың даму үшін қандай мүмкіндіктер алатыны туралы айтып берді.

"Жас Темір" бағдарламасы ҚТЖ-ның бейінді оқу орындарымен өзара іс-қимылының жол картасы шеңберінде іске асырылуда. Бағдарлама алғаш рет 2022 жылы басталды, оған 38 студент қатысты.

Биыл бағдарламаға қатысу үшін 37 өтінім келіп түсті. Тағылымдамадан өтушілер іріктеудің үш кезеңі: кандидаттарды тіркеу бойынша бастапқы нәтижелері, құзыреттері бойынша сұхбаттасу және конкурстық комиссиямен қорытынды әңгімелесуден өтті.

Нәтижесінде 8 үміткер "ҚТЖ - Жүк тасымалы" ЖШС, "ҚТЖ-Жолаушылар локомотивтері" ЖШС және "ҚТЖ" ҰК" АҚ - "Магистральдық желі дирекциясы" филиалында ақылы тағылымдамадан өтеді.

Тағылымдамадан өтушілер ҚТЖ компаниялар тобында үш ротациядан өтеді, олардың әрқайсысы 5 айға созылады. 1,5 жылдан кейін бағдарламаға қатысушы Қазақстан ірі компаниясында мансабын бастай алады.

ҚТЖ-дағы тағылымдама - жоғары оқу орындарының түлектері үшін өзін танытуға және алғашқы жұмыс тәжірибесін алуға бірегей мүмкіндік.