Игілікті интеграция: түсіндіру науқаны жүріп жатыр

Интеграция аясында ҚБМ Директорлар кеңесі бірқатар бағыттарды жетілдіретін жаңа құрылым бекітті. Бірігу арқасында әкімшілік кедергілер жойылып, жұмыс уақыты мен еңбек ресурстары тиімді пайдаланылады деп күтілуде. Барлық блок жұмысшыларымен өткен кездесуде жаңа құрылым таныстырылды.

«Осындай өндірістік көрсеткіштер мен ұйымшылдықтың арқасында біз ірі холдингке айнала аламыз. Интеграция өндірістік міндеттерді орындау тиімділігін арттырып, ҚБМ, АТС, ТМС және ТКжҰҚКБ арасындағы шарттық қатынастарды жояды. Сонымен қатар, қағазбастылықты азайтып, жүйе бойынша біртұтас үлкен ұжымды дамытамыз. Біз уақыт көшінен қалмай алға қадам бассақ, талай шыңды бағындырарымыз сөзсіз», – деді басқарма мүшелері.

ҚБМ-да интеграциялау аясында екі басқарма құрылды, олар:

• технологиялық көлік басқармасы және ұңғымаларды бұрғылау басқармасы;
• жерасты күрделі жөндеу.

Айта кету керек, барлық жұмысшылар үшін жұмыс орындары, еңбекақы төлеу деңгейі, еңбек шарттарының қолданылу мерзімі және демалыс кестелері сақталады.

«Интеграция бізге жан-жақты дамуға мүмкіндік береді. Көптеген жылдан бері бірге мұнай саласының дамуына зор үлес қосып келе жатырмыз. Ұжымдастарымызды жақсы танимыз. Енді біртұтас компанияның жұмысшылары ретінде жұдырық болып жұмылып, жүктелген міндетті абыроймен атқаратынымызға сенемін», – деп атап өтті «Арғымақ Транс Сервис» ЖШС бірінші вице-президенті Шаттық Кульшиков.

Ұжыммен кездесу ашық диалог форматында өтіп жатыр. Жұмысшылар басшылыққа өзін толғандырған сұрағын қойып, қос тарап алдағы өзгерістерді бірге талқылайды. Кен орнында талай жылды бірге өткерген Қаражанбас мұнайшылары әрі қарай да бір шаңырақ астында ел игілігі жолында еселі еңбек ете бермек.

(«Қаражанбасмұнай» АҚ facebook парақшасынан алынды)