Індет қазақстандық әртістерге дамудың жаңа мүмкіндіктерін ашты

«Қандай да бір оқиғаға баға беру үшін алдымен уақыт қажет. Індеттің басталған сәтінен бір жылдан сәл астам уақыт өтті, тұтас еліміз, барша қазақстандықтар Covid-19 атты сынаққа тайсалмай, төтеп беруде деп нық сеніммен айта аламыз. Театрымыз жаңа болмыстарға белсенді үн қатты: көп рет қолдануға болатын бетперделерді тігуді бастап, алғашқылардың бірі болып елорда тұрғындарына көмек қолын созды. Вокалистер мен балет әртістері Мәдениет және спорт министрлігімен жасалған жобаларға, атап айтқанда, «Карантиндегі жұлдыз» тележобасына қатысты. Жалпы алғанда, баршаға қиын болған осынау кезде барлық мәдени және спорт мекемелерін қолдауда Ақтоты Рахметоллақызының қосқан елеулі үлесін атап өткім келеді. Тіпті қатаң карантин жеңілдетілгеннен кейін де оның бар ынта-зейіні арқасында театр ғаламат премьераларды жүзеге асырып, барша қазақстандықтарға нағыз сый жасады», – деді Қазақстанның еңбек сіңірген қайраткері, «Астана Опера» театрының директоры Ғалым Ахмедьяров.

Танымал өнер қайраткерлері Талғат Мұсабаев, Медет Чотабаев, Жұпар Ғабдуллина, Жаннат Бақтай, Салтанат Ахметова, Евгений Чайников, Бағдат Әбілхановтың айтуынша, театрдың жан-жүрегі – сахна, ол залда көрерменнің қошеметі соғылған кезде дүрсіл қағады, ал карантин жеңілдетілгеннен кейін бұған себеп те көп болды. «Дон Паскуале», «Махаббат сусыны», «Дала үні» спектакльдерінің премьералары, көптеген жаңа концерттер мен симфониялық бағдарламалар әртістер мен көрермендердің жүрегіне үміт отын жағып, өмірдің қалыпты арнаға түсіп келе жатқандығына нық сендірді.

Карантин балет әртістері үшін қиынға соқты, олар үшін дайындықсыз өткізген бір күннің өзі жұмыссыз екі аптаға пара-пар.

«Дене физикалық қозғалыстың жоқтығын бірден сезеді, үй жағдайында жасалған жаттығу залдағы толыққанды сабақты алмастыра алмайды. Дағдыға айналған жұмыс тәртібімізге бірден кірісіп кету оңай болмады, сондықтан спектакльдерде өнер көрсету, тіпті көрермендердің шектеулі санына премьералар қою мүмкіндігінің туындағанына шын қуаныштымыз. Балет әртісінің шығармашылық ғұмыры қысқа, сол себепті біз үшін әр күніміз бен сағатымыз аса маңызды», – деді «Астана Операның» жетекші солисі, Қазақстанның еңбек сіңірген қайраткері Бақтияр Адамжан.