Исатай, Махамбет пен Әлия, Мәншүк

Сәбилер ер жетіп, төртемнің екеуі Мәншүк пен Әлия бүгінде Атырау қаласындағы Бизнес және құқық колледжінің 4-курсында оқып жатыр. Болашақ IT мамандары. Ал Исатай мен Махамбет жақында Алматының іргесінде орналасқан №6654 әскери бөлімшесінде азаматтық борыштарын өтеп қайтты .

«Әскер қатарына 2020 жылдың 8 маусымы күні шақырылған едік. Бір жыл бойы туған үйіңнен жырақта болу оңай емес. Алайда, пайдасын да сезіндік. Айналаңда болып жатқан әрбір нәрсеге, оқиғаға басқаша көзбен қарайсың, ағайын-тумаға деген ерекше бауырмалдылық, қасыңдағы жолдасыңа деген сыйластық қасиеттерді байқайсың бойыңнан», – деген Исатайдың сөзін Махамбет жалғады:

«Әскер қатары әрбір ер-азаматты шыңдайды. Бұл жерде баршаға ортақ қатаң тәртіпті сақтауды, бұйрықты бұлжытпай орындауды біз әскери өмірден үйрендік. Үйреніп қана қоймадық, жақсы қасиеттерді бойымызға дарыттық. Туған үйіңнен шалғайда жүргенде әр нәрсеге тереңдей бойлайсың. Ойланасың, өмірдің әр қырына бейімделесің. Әп-сәтте есейіп кеткендей боласың».

Балалардың анасы Гүлшат Жармұханова «Алтын алқамен» марапатталған «Батыр ана». Тағаниязовтардың отбасында 7 бала тәрбиеленуде.