Қарағандыда вагон-дөңгелек жөндеу шеберханасы ашылды

«Бір терезе» қағидаты бойынша жұмыс істейтін орталық өңірдегі алғашқы вагон-дөңгелек жөндеу шеберханасының қуаттылығына келсек, ол жылына 3000 дөңгелекті құрайды. Кәсіпорын мамандарының айтуынша, бұл орталық аймақтағы тапсырыс берушілердің қажеттілігін қанағаттандырып, көлік шығынын төмендете түспек. Оның үстіне, «Қарағанды вагон жөндеу депосы» филиалының қызмет номенклатурасының кеңейе түсуі қосымша жұмыс орындарын ашуға мүмкіндік береді. 

Вагон-дөңгелек шеберханасын ұйымдастыру барысында «Үнемді өндіріс» бағдарламасына сәйкес жұмыс орнын механикаландырумен қосарлы әрекет ететін заманауи пресс жабдығы, өлшеу және бұзбай бақылау құралдары, сондай-ақ, сандық бағдарламамен басқарылатын станок жабдығы орнатылды. Сонымен қатар өндірістік персонал оқытылып, жұмыс істеуге даярланды.

Ал құзыретті комиссия дөңгелек жұптарының тәжірибелік үлгілерін қабылдап алып, таңбалаудың шартты нөмірінің қолданысын кеңейтуге куәлік алды. Аталған шеберхана РУ-1Ш типті жүк вагондарының дөңгелек жұптарын жөндеумен қатар, жүк көтергіштігі жоғары РВ2Ш типті, РУ-1 және РУ-1Ш типті дөңгелек жұптарына күрделі жөндеу жүргізеді.

Сұлугүл Бакесова

Дереккөз: «Қазақстан теміржолшысы»