Қаражанбас: 57 миллион тонна мұнай

Компания басшылығы әріптестерді бағындырған кезекті белесімен құттықтап, мұндай көрсеткіштің артында компания жұмысшыларының табандылығы мен қажырлы еңбегі тұрғанын атап өтті.

«Биыл ҚБМ қос мерекені – Қоғамның құрылғанына 35 жыл толуы және 57 миллион тонна мұнай өндіргенімізді атап өтеді. ОПЕК-тің мұнай өндіру бойынша белгіленген квотасына қарамастан, біздің жұмысшылар өндіріс көлемін арттыруға көп тәжірибе мен күш жұмсады. Әрине, бұл біздің геологтарымыздың, шеберлердің, операторлардың, жөндеушілердің, жүргізушілердің және басқа да мамандардың еңбегі. Біздің ұжымның саны да, күші де мықты бола түсті», – деді ҚБМ Бас директорының бірінші орынбасары Қуанышбай Нұрғалиев.

Қаражанбаста игеру басталғаннан бері республика бойынша көптеген әдіспен мұнай өндіретін кен орны құрылды. Ол тұтқырлығы жоғары мұнайды әзірлеу, пайдалану процесін бақылау және реттеу жүйесін пысықтау бойынша жаңа технологияларды сынау үшін базалық объектке айналды.

«Соңғы 18 жыл ішінде Қаражанбас кен орнындағы барлық жұмысшылар мен олардың қажырлы еңбегі арқасында жыл сайынғы мұнай өндіру көлемі 2 миллион тоннадан асып келеді. Соның арқасында 2021 жылдың 1 қыркүйегінде кезекті 57 миллион тонна мұнай өндірдік», – деді ҚБМ-ның игеру бөлімінің басшысы Владимир Турков.

Қаражанбас кен орнының қалған 38,6 миллион тонна алынатын қоры, сондай-ақ жағалау аймағы мен Оталған учаскесіндегі жаңа геологиялық барлау жұмыстарын ескерсек, ҚБМ жұмысшыларының болашағы жарқын деуге толық негіз бар.