Қаражанбастағы ерекше аялдама

Алдымен пайдалану мерзімі аяқталған ескі Краз көлігінің кабинасы таңдалып, оны әрлеу жұмыстары қолға алынды. Кейін құрастырушылар мен дәнекерлеушілер темірден аялдама жасап, арнайы техникамен біріктірді. Көлік қызметкерлері жұмыс орнына тасымалдайтын автобусты күтетін орын қыста пана, жазда сая болатынына қуанышты. Жұмысшылар креативті аялдама тек гараж маңына көрік беріп қана қоймай, ерекше көңіл-күй сыйлайтынын айтады.
 
«Әріптестермен ортақ шешімге келіп, осындай жоба жасауды ұйғардық. Ол үшін Краз көлігінің таңдалуы да бекер емес. Бұл кен орнына ұзақ жыл еңбек еткен техника. Қазір зауыттан шығарылмайды. Сондықтан тарихи техника ұмыт қалмасын деп, ерекше аялдамаға айналдыру туралы идея пайда болды. Бұл көлік қызметкерлері атынан мұнайшылардың кәсіби мерекесіне тарту десек те болады»,- деді Өндірістік басқарма директорының көлік жөніндегі орынбасары Мұзафат Тлембаев.
 
Өндірістік басқарма арт-жобаны жасауға атсалысқан мамандарға алғыс білдірді. Оларға мерекеге орай Құрмет грамоталары мен алғыс хаттар табыс етілді. Қазір көпшілктің көңілінен шыққан аялдама жанында естелікке суретке түсушілер көбейген.