Қаражанбастағы Наурыз салтанатынан көріністер

Наурыздың сан ғасырдан сақталған дәстүрлері халықтың рухани құндылықтарын бір арнаға тоғыстырып, бабадан балаға мирас болып келеді. «Қаражанбасмұнай» АҚ мұнайшылары атаулы күнді бүкіл елмен бірге ақ тілекпен, ізгі ниетпен қарсы алды. Орталық кеңсе аумағында Ұлыстың ұлы күні – Әз Наурыз сән-салтанатпен атап өтілді.

ҚБМ қызметкерлері бір-бірін мерекемен құттықтап, елге амандық, еңбектеріне жеміс тіледі. Кеңсе алдындағы киіз үйлерге мол дастархан жайылып, жұмысшылар Ұлы күннің басты нышаны - Наурыз көжеден дәм татты. Мереке жергілікті өнер иелерінің концерттік бағдарламасына ұласты.

Шарада персоналды басқару және еңбекақы төлеу департаментінің қызметкерлері қазақ халқының салт-дәстүрінен көрініс сахналады. Сондай-ақ «Тұсау кесу» рәсімі аясында үлкендер ақ бата беріп, баланың қадамына сәттілік тіледі.

Домбыра күмбірі мен туған жерге арналған әндер мереке ажарын аша түсті. Мұнайшылар «қара жорға» билеп, бой сергітті. Бұдан бөлек олар спорттық жарыстарға қатысып, арқан тарту, ләңгі тебу және садақ ату сайыстарында бақ сынады. Ұлыстың Ұлы күнінде салтты сақтап, қазақылықты дәріптеу - қаражанбастықтар үшін игі дәстүрге айналған.