Қазақ темір жолының 120 жылдығына арналған конференция өтті

Маңызды іс-шараға көлік-логистика және телекоммуникация саласындағы жетекші кәсіпорындардың мамандары, бизнес-қоғамдастық өкілдері, Қазақстанның, Қытай мен Ресейдің білім және көлік саласындағы мамандары, мәжіліс депутаттары, ғалымдар, PhD докторанттар, оқытушылар, аспиранттар, магистранттар және ЖОО студенттері қатысты.  

Конференция мақсаты – өзара тәжірибе, зерттеулер, заманауи әдістер алмасу, студенттердің кәсіби машықтарын жетілдіру. Жиында көліктегі сандық жүйелерді дамытудың өзекті мәселелері, телекоммуникациялық байланыс жүйелерін дамытудың мәселелері мен перспективалары, электр энергетикасындағы сандық технологиялар, логистикадағы инновациялық технологиялар, тасымалдау процесіндегі инновациялар, автомобильдер мен жол техникасы, теміржол жылжымалы құрамын жобалау, пайдалану және жөндеу, құрылыс инженериясының өзекті мәселелері сөз болды. Көліктегі инновациялық технологиялар және оның өндірістегі рөлі жайлы маңызды баяндамалар жасалды.  

«ҚТЖ» ҰК» АҚ бас инженері Рамазан Садырқұлов конференцияға онлайн түрде қатысып, маңызды іс-шараның жұмысына сәттілік тіледі. Конференцияда Қазақстанның теміржол тарихында орны бөлек тұлға Мұхамеджан Тынышпаевтың саланы дамытуға қосқан үлесі туралы бірнеше баяндама жасалды. Орталық Азиядағы теміржол инфрақұрылымының дамуына өзіндік үлесін қоса отырып ол еліміздің экономикалық және мәдени тұрғыда дамуына септік еткен мемлекет қайраткерінің Түрксіб теміржолының құрылысы мен жобалауына қатысқан еңбегі айрықша аталды. Еуропалық үлгіде техникалық білім алған қазақтың тұңғыш жоғары білімді теміржол инженерінің бойындағы бірегей білімі мен қабілетіне қоса көшбасшылық қасиеттері оны мемлекеттік деңгейдегі қайраткер дәрежесіне көтергені айқын. Іс-шара барысында көлік-логистика саласына еңбегі сіңген бірқатар азаматтар «М.Тынышпаевтың 145 жылдығы» төсбелгісімен марапатталды.

Райхан Рахметова

Дереккөз: "Қазақстан теміржолшысы"