Қазақстанның 2030 жылға дейінгі көлік-логистика әлеуетін дамыту тұжырымдамасы жасалды

Қазақстанның 2030 жылға дейінгі көлік-логистика әлеуетін дамыту тұжырымдамасы биыл бекітіледі. Бұл жайында Мәжіліс депутаттарының сауалына ҚР Премьер-Министрінің бірінші орынбасары Роман Склярдің жауабында айтылған, деп хабарлады ҚазАқпарат агенттігі.

«Бүгінде Қазақстанның 2030 жылға дейінгі көлік-логистика әлеуетін дамыту тұжырымдамасы дайындалды. Онда аталған іс-шараларды іске асыру және теміржол саласы нарығындағы бәсекелестікті дамыту көзделген. Оны жылдың соңына дейін бекіту жоспарланып отыр. Бұл тұжырымдама мүдделі мемлекеттік органдарға және «Атамекен« ұлттық кәсіпкерлік палатасына келісуге жіберілді. Аталған тұжырымдама көлік инфрақұрылымын мемлекетаралық, ұлттық және салалық стандарттардың талаптарына сәйкес келтіруге, сондай-ақ цифрландыру, автоматтандыру, қозғалысты реттеу және басқару құралдарын одан әрі жетілдіруге, дамытуға және енгізуге бағытталған», - деді Роман Скляр.