ҚБМ ІІ вахта ауысымының жеңімпаздарын анықтады

Жарыс тартысты футбол матчтарынан басталды. 11 команда керемет кездесулер өткізіп, ақтық кезеңде мұнай өндіру цехы мен электр цехының ойыншылары кездесті. Төрешілер шешімімен ІІІ орынға өндірісті автоматтандыру цехы командасы жайғасты. Ал №3 мұнай өндіру цехының футболшылары ІІ орын, электр цехының командасы I орынды иеленді.

Волейбол сайысы жанкүйерлер жадында жарқын сәттермен қалды. Мұнда да 11 команда мықты соққылар жасап, бәсекеге толы ойын көрсетті. Үздіктер арасынан дараланған ардагерлер құрамасы ІІІ орынға лайық деп танылды. Бу өндіру цехының жігіттері жүлделі ІІ орынға ие болды. Ал, технологиялық көлік басқармасының командасы жеңімпаз атанды.

Қаражанбастықтар арқан тарту жарысында ең алдымен командалық рух қажет екенін жақсы біледі. Бұл сайыс кезінде жеңіске жету жолындағы сенімділікті арттырады. Көлік басқармасының сенімді және тәуекелшіл жұмысшылары қарсыластардан басым түсіп, І және ІІІ орындарды қанжығасына байлады. Ал ІІ орын № 3 МӨЦ командасына бұйырды.

Білектілер бәсекесінде ең мықтыны анықтау оңай шаруа емес. Алақан айқастырған 10 қатысушы қысқа уақытта үздік нәтиже көрсету үшін тиімді тәсілдерді қолданды. Нәтижесінде ІІІ орынды ТКБ жүргізушісі Канжар Сыдықов жеңіп алды. ТКБ жетекші инженері Ерлан Қайлюбаев қос жарыста оң нәтиже көрсетіп, қол күресінен ІІ, ал кір тасын көтеруден ІІІ орын алды. Кір тасын көтерудің қола жүлдесі ЭЦ электромонтері Абу Баймұратовқа бұйырды. Екі жарыста топ жарған БӨЦ машинисі Бақтияр Тлеубаев жеңіс жолында қарсыластарын басып озды.

Жарыс жеңімпаздары мен жүлдегерлеріне құрмет грамоталары, кубок, медальдар табыс етілді.