«Қазақтелеком» маманы: Z-Telecom мені сенімді болуға баулыды

Дәурен Сейітқұл – жас болса да, қызметте, әлеуметтік өмірде әрі өзін дамытуда айтулы жетістіктерге жетіп үлгерген маман.

2014 жылы университетті «Радиотехника, электроника және телекоммуникациялар» мамандығымен бітіре сала «Қазақтелекомға» монтёр болып жұмысқа тұрды. Көп кешікпей қызметі де өсе бастады: жұмысқа жаңа келген жас маман Оңтүстік ӨТД Жергілікті желілерге техникалық қызмет көрсету орталығының инженері болды, 2017 жылы құрылысты қадағалау жөніндегі 2-санатты инженер дәрежесін алды, артынша Орталықтың жетекші маманы болды.

Кәсіби жетістіктерінен бөлек, Дәурен әлеуметтік өмірге және әріптестерімен қарым-қатынасқа ерекше мән береді. Сондықтан да ол жас қызметкерлердің өзін көрсетуіне мүмкіндік беретін «Z-Telecom» жастар ұйымына қосылды.

«Z-Telecom мені сенімді болуға баулыды, алдыма мақсат қойып, нәтижеге жетуге үйретті. Шаршы топта сөз сөйлеуге батылым бармайтын, соны жеңгеніме қуаныштымын – бұл маған жұмыста адамдармен сөйлесуге көмектеседі», – дейді Дәурен Сейітқұл.

Бүгінде Дәурен Оңтүстік ӨТД кадрлар резервінде тұр. Оның айтуынша, бұл мәртебе қосымша жауапкершілік жүктейді, жаңа белестерді бағындыруға ынталандырады.