Қазақтелекомда Транскаспий жобасын іске асыру мәртебесі айтылды

Телеком-оператордың Басқарма Төрағасы Қуанышбек Есекеев Кеңес мүшелеріне өткен жылы компания «AzerTelecom» компаниясымен су асты байланыс желісін бірлесіп салу туралы келісімге қол қойғанын еске салды.

Транскаспий каналының негізгі бағыты Ақтаудан Әзірбайжанның Сиазанына дейін өтеді және 340 км-ден асады, сонымен қатар ұзындығы 330 км-ге жуық резервтік желі қазақстандық Құрық портынан Баку маңындағы Бузовна пунктіне дейін салынады.

«Қазақтелеком» басшысы атап өткендей, Транскаспий жобасы Қазақстан үшін стратегиялық тұрғыдан өте маңызды, өйткені оны іске асыра отырып, ел халықаралық трафикке қосымша шығу жолын және Азия елдерінен Қазақстан аумағы бойынша және суасты кабелі арқылы Әзірбайжанға жаһандық трафиктің транзитін қамтамасыз етуге мүмкіндік беретін жаңа арнаға ие болады, әрі қарай Грузия, Қара теңіз, Болгария арқылы Еуропаға шығады. Бұдан басқа, жоба жаңа цифрлық телекоммуникациялық дәліз құруды жеделдететін драйверге айналады  және Қазақстан нарығына ірі технологиялық (big tech) компанияларды тартуға ықпал ететін болады.

Қазіргі уақытта HLD (high-level design) жоғары деңгейлі дизайны әзірленді, толық ақпаратты қамтыған жол картасы бекітілді, қазір зерттеу жұмыстары аяқталуда. Каспий түбімен "оптика” тартатын құрылыс жұмыстарын тепе-тең негізде Қазақстан-Әзірбайжан бірлескен кәсіпорны жүзеге асырады деп күтілуде.