Қазпошта бірінші жарты жылдықты қорытындылады

«Қазпоштаның жыл сайын шығынға батып отырғанын ескерсек, бүгінде азаматтар бізден заман талабына сай өзгергенімізді талап етіп отыр. Яғни, Қазпошта клиент талабына сай қызмет сапасын көтеріп, олардың сұранысын толықтай қанағаттандыруы тиіс. Ол үшін поштаның өңірлердегі филиалдарының алар орны ерекше. Себебі клиентпен тікелей жұмыс істейтін сіздерсіздер. Сондықтан баршаларыңыздан жұдырықтай жұмылып, Қазпоштадағы қызмет сапасын арттырып, қоғам алдындағы беделін арттыруға аямай күш жұмсауға шақырамын», - деді басқарма төрағасы Әсел Жанасова.

Жиын барысында келесі сөз кезегі Жобалық кеңсе директоры А. Кескінбаевқа берілді. Ол өз кезегінде ұйымның биылғы жылдың бірінші жарты жылдығындағы жұмыс қорытындыларымен бөлісіп, қатысушыларға презентацияны назарға ұсынды.

«Қазпоштада шығын көлемі тек 2022 жылы 12,5 млрд. теңге болғаны баршаға мәлім. Айта кетерлігі, аталған сома биылғы бірінші жарты жылдықта барынша қысқарып, болжалды 10 млрд теңгенің орнына, бар жоғы 300 млн теңгені құрады. Біз үшін бұл - зор жетістік», -  деді ол.

Одан бөлек басқосуда СЕО «Kazpost Digital» Ә. Нұрғалиева ұлттық пошта операторын заман талаптарына сай дамыту, оның ішінде процесстерге түрлі ақпараттық технологияларды енгізу жоспарымен таныстырып өтсе, Халықаралық бизнес жөніндегі басқарушы директор С. Пак Қазпоштаның электронды сауданы дамыту және шетелдік танымал маркетплейстермен байланыс орнату мүмкіндігі жайлы әңгімелеп берді.

Аймақ филиалдарының қатысуымен өткен отырыста, поштаның мемлекеттік қызметтерді ұсыну мүмкіндігі жайлы да айтылды. Естеріңізде болса, Қазпошта биылдан бастап Цифрлық даму, инновациялар және аэроғарыш өнеркәсібі министрлігі және «Азаматтарға арналған үкімет» КЕАҚ-мен бірлесіп Алматы, Жетісу, Павлодар, Атырау, Қызылорда және Ақмола облыстарындағы ауылдық пошта байланысы бөлімшелерінде 27 мемлекеттік қызметті ұсынып отыр. Шалғайдағы ауыл-аймақ тұрғындарына бұл шешім уақыт үнемдеп, күнделікті тұрмысқа қажет көптеген мемлекеттік қызмет түрлерін өз ауылында отырып-ақ алуға мүмкіндік береді. Мемлекеттік қызмет жөніндегі басқарушы директор Д. Бекмановтың сөзінше алдағы уақытта аталған қызмет түрлерінің саны көбейіп, пилоттық жоба басқа да бірнеше өңірде жалғасатын болады.

Тағы бір айта кетер жайт, ұлттық пошта операторы пошта қызметтерінен бөлек, тұрғындарға бүгінде түрлі қаржылық, брокерлік және агенттік қызметтер де ұсынып отыр. Компанияның бұл бағыттағы әлеуетімен Қаржы қызметтері жөніндегі басқарушы директоры Ш. Абирова таныстырды. Ол филиал жетекшілеріне Қазпоштаның қаржылық жағдайын дәл осы қызмет түрлерін ұсыну арқылы жақсартуға болатынын мәлімдеп, осы бағыттағы жұмысты жандандыру қажеттігін атап өтті.

Күн соңында екінші тоқсан қорытындысы бойынша үздік нәтиже көрсеткен филиал анықталып, оларға арнайы кубок табысталды. Бұл жолы кубок Шымкент поштамтынан Алматы поштамтына өтіп, оңтүстік астана поштамтының қызметкерлері үздік деп танылды. Осылайша, Жобалық кеңсе директоры А. Кескінбаев филиал басшысы А. Садықоваға кубокты табыс етті. Айта кетерлігі, аталған поштамт ұлттық пошта операторының 1000-нан астам қызметкер жұмыс істейтін, 71 өндірістік нысаны бар ең ірі поштамты болып саналады.

Компания басшылығының айтуынша, бұл әдіс филиал мамандарына үздік нәтиже көрсетуге ынталандырып, оларға жалақыдан бөлек сыйақы алуға мүмкіндік береді.

Кездесудің екінші күні филиал басшыларына түрлі тақырыптағы семинар-тренингтар ұйымдастырылып, оларға корпоративтік инновациялар, коммуникациялық стратегия және клиентке басымдық беру тетіктері таныстырылды.

Екі күнге созылған айтулы жиынды «Қазпошта» АҚ басқарма төрағасы Әсел Жанасова қорытындылап, филиал жетекшілеріне нақты тапсырмалар берді.

«Компанияның аяқтан тік тұрып, қарқынды дамуында сіздердің үлестеріңіз зор болуы керек. Ол үшін, барлықтарыңыздан халықпен, клиенттермен, бөлімше қызметкерлерімен жиі кездесіп, өзекті мәселелерді сол жерде тез әрі нақты шешулеріңізді сұраймын. Менің, жалпы Қазпоштаның өңірлердегі көзі мен құлағы сіздерсіздер, сол себепті бірлесіп, қажырлы жұмыс істейік», - деді басқарма төрағасы Ә. Жанасова.

Сөз соңында, сондай-ақ ол енді мұндай алқалы жиын тоқсан сайын өткізіліп тұратынын әрі онда ұйымның жұмысына оң әсер ететін маңызды шешімдер қабылданатынын атап өтті.

Майнұр Жанақова