ҚБМ механигі: Еңбегім – ел игілігіне

Ол осыдан 22 жыл бұрын қарапайым автокран жүргізушісі болып еңбекке араласты. Арнайы техниканың тілін тауып, мол тәжірибе жинаған қызметкер араға он жыл салып, жұмыс бағытын өзге арнаға бұрды. Бүгінде Болат Әбішев ТКБ №1 автотізбегінің аға механигі. Ол өз әріптестерімен бірге өндірістік цех қызметкерлерін тасымалдайтын 70-ке жуық көліктің үздіксіз қозғалысын қадағалайды. Сондай-ақ жұмыстың оңтайлы ұйымдастырылып, сапалы атқарылуына жауапты береді.

«Қаражанбас жыл сайын жаңа технологиялар мен әдістерді енгізіп, ерекше қарқынмен дамып келеді. Әсіресе биыл компанияның көлік саласында көптеген оң өзгерістер орын алды. Соның арқасында жұмысымызда жаңа леп сезіліп, нәтижелі еңбек етуге құлшынысымыз арта түсті», – дейді Болат Әбішев.

Ол бойында қаны тулаған, жүрегі патриоттық сезімге толы жұмысшы. Ол тәуелсіздік тұмарына айналған желтоқсан оқиғасы кезінде егемендік үшін бас көтергендердің бірі. Сондықтан қазіргі алаңсыз шақты қадірлеп, жастарға Отанымызды өркендету үшін барын салу керектігін үнемі айтып отырады.