ҚМГ басшысы Жаңаөзендегі Bolashaq Sarayi құрылыс барысын тексерді

«ҚазМұнайГаз» ҰК АҚ (ҚМГ) Басқарма төрағасы Асхат Хасенов Жаңаөзенде салынып жатқан оқушылар сарайының құрылыс барысымен танысты. Бір мезгілде 350-ден астам баланы қабылдай алатын, ауданы 3 000 шаршы метрлік заманауи білім беру кешені жаңаөзендік балалардың жан-жақты дамуына мүмкіндік беретін орталыққа айналмақ.

2025 жылғы 3 шілдедегі жағдай бойынша мынадай құрылыс жұмыстары орындалды: жер жұмыстары, шұңқыр қазу, іргетас пен бетон қаңқасы (бағаналар, сыртқы қабырғалар мен ішкі аралық қабырғалар, баспалдақтар және т.б.) салынып бітті. Сыртқы және ішкі инженерлік желілерді, терезелер мен витраждарды, қасбетті орнату және ішкі әрлеу жұмыстары басталды.

ҚМГ басшысы нысанның әлеуметтік маңызына тоқталып, бекітілген жұмыс мерзімін сақтауды тапсырды. Нысан құрылысын аяқтау және оны пайдалануға беру 2025 жылдың соңына жоспарланған.

ҚМГ әлеуметтік жауапты компания ретінде өз кәсіпорындары орналасқан өңірлерде әлеуметтік жобаларды тұрақты негізде іске асырып келеді.