Күш – бірлікте! Қаражанбас компаниялар тобы бірігуде

Бірігу – компания үшін дамуға жаңа серпін береді. Интеграция арқасында компаниялар сервистік қызмет көрсетуден өндіру саласына ауысады. Оған қоса өндірістік міндеттерді орындау тиімділігі артып, шығындар азаяды. Бұдан бөлек персоналды дамытудың бірыңғай жүйесін іске асыруға мүмкіндік береді деп күтілуде.

Мұнайшылар тарапынан туындаған сауалдарды талқылау мақсатында компания басшылығы түсіндіру жұмыстарына кірісті. Басқарма мүшелері кен орнына жұмыс сапары кезінде бірінші вахта ауысымындағы мұнайшылармен кездесіп, интеграция жайлы толық ақпарат берді.

«Біз ұзақ жылдар бойы бір кен орнында үлкен ұжым ретінде бірге жұмыс істеп келе жатырмыз. Алайда кейбір ішкі процестерде шектеулер болды. Интеграция персонал дамуындағы барлық кедергіні толығымен жояды. Бұл тұрақты дамуға жаңа мүмкіндік беретін саналы да салмақты шешім. Бәріңіз бір-біріңізді жақсы танитындықтан, алдағы уақытта ұжым бірлігі бұдан да арта түседі деген сенімдеміз. Мұнайшылар бұрынғы тәртіппен жұмыс істей береді, өзгеріс тек құжаттарда болады», – дейді Басқарма мүшелері.

Интеграция аяқталған соң барлық қызметкердің жұмыс орны, жалақысы, еңбек шартының мерзімі, демалыс кестесі өзгеріссіз қалады. Кездесу аясында мұнайшылар басшыларға сауал қойып, сұрақтарына толық жауап алды.

«Мен Қаражанбаста 20 жылдан бері жұмыс істеймін. Аталмыш өзгерістерге өте қуаныштымын. Ұжымдастармен бір үйдің баласындай татумыз. Біздің компаниялардың бірігуі өндірістің өрге басуына себеп болатынына сенімдімін», – деді «Тұлпар Мұнай Сервис» ЖШС Өндірістік қамтамасыз ету базасының басшысы Сәдуақас Битан.

Интеграция жұмыстары 1 шілдеге дейін аяқталады деп күтіліп отыр.