Маңғыстау мұнайшылары шаруаларға 100 мың литр дизель отынын береді

Ауыл шаруаларын қолдау шарасы шілде айынан жүзеге асырыла бастады. Күні бүгінге дейін Қарақия ауданына 15 500 литр және Маңғыстау ауданы қажеттіліктеріне деп 5 мың литр дизель отыны жолданды. Бұл отын биыл өлкемізде орын алған қуаңшылық салдарынан қалыптасқан жем-шөп тапшылығын жоюға жұмсалады.

Мәселен, Қарақия аудандық ауылшаруашылығы бөлімі берген ақпарат бойынша қазір «Кендірлі-Қаясан» мемлекеттік табиғи қорығы аумағында, Темірбаба, Сәрсенбай кенорны, Сайөтес жері мен Ақтөбе облысында жалпы саны 8 шөп орушы бригада қызмет етіп жатыр. Күні бүгінге дейін 2 322 тонна шөп орылып, Қарақия ауданына қарасты Құланды, Жетібай, Мұнайшы, Бостан, Сенек, Құрық және Болашақ ауылдары шаруаларының арасында үлестірілген. Жыл соңына дейін бұл көрсеткіш 4 мың тоннаға жетеді деп жоспарланып отыр. Одан бөлек, Қарақия ауданы ауылшаруашылығы бөлімі ұйымдастыруымен Компания көмекке бөлген дизель отынының бір бөлігі өлкеге сырттан әкелінетін жем-шөп бағасын тұрақтандыру үшін жүк тасымалдаушылардың жол шығынының өтемі ретінде де беріліп отыр.

Елдің қажетіне жарай білу – «Маңғыстаумұнайгаз» АҚ ұстанған әлеуметтік саясаттың басым бағыттарының бірі.