29 шілде 2021, 11:00 1618

Машинист Мақсат – Тәуелсіздік құрдасы

Тәуелсіздік аспаны астында дүниеге келіп, ел игілігі үшін еңбек ететін жастар – Қаражанбастың қозғаушы күші. Орда бұзар жасы мен кен орнындағы еңбек жолының он жылдығы қатар келген Тәуелсіздік құрдасы – бу өндіру цехінің машинисі Мақсат Сақтағанов.

Қаражанбасқа алдымен химиялық су тазарту аппаратшысы болып жұмысқа қабылданған Мақсат, аталмыш қызметті тоғыз жыл бойы мінсіз атқарды. Өндіріс өмірінен көргені мен түйгені көп тәуелсіздік құрдасы былтырдан бері СБГҚ машинисі болып жұмыс істейді. Бу өндіру цехі жер қабатына су мен бу айдау арқылы мұнай өндіретін кен орнының жүрегі саналса, Мақсат сияқты жұмысшылар цех үшін маңызды маман.

«Қаражанбас бізді есейтіп, өз ісінің шебері атандырды десем артық болмас. Тәуелсіздік құрдасы ретінде Отан алдында адал еңбек етуді асқан жауапкершілікпен сезінемін. Қанатымызды қатайтқан кен орны менің өмір дастанымның алтын тарауы ретінде мәңгілікке сақталады», – дейді Мақсат.

Арманы асқақ, мұраты айқын Мақсат Қазақстанның қарыштап дамуы үшін қызмет етіп жүрген замандастарын мақтан тұтады. Төрт баланың әкесі перзенттерін нағыз патриот етіп өсіруге ниетті. Қатарластарынан оза шауып, игі ісі мен адал еңбегінің арқасында алғысқа бөленіп жүрген осындай азаматтар барда болашақ жарқын, келешек кемел екені хақ.

Еще больше новостей на нашем telegram-канале , подписывайся и будь в курсе!

К списку статей Следующая статья