31 желтоқсан 2021, 08:30 1355

Мұнайшылар балаларға жаңа жылдық көңіл-күй сыйлады

Жаңа жыл қарсаңында барлық бала мерекеден сиқыр күтеді. Осыған орай «Қаражанбасмұнай» АҚ ұжымы балаларды қуантуға асықты. Қайырымдылық акциясы аясында мұнайшылар 40-қа жуық аз қамтылған отбасыға барып, азық-түлік себеттерін тапсырды, балаларға жаңа жылдық тәттілер таратылды.

Отбасыларды құттықтауға үлгеру үшін орталық кеңсе қызметкерлері бірнеше топқа бөлінді. Көмек алдымен қарттарға, көп балалы отбасыларға көрсетілді. Солардың бірі – Тұрсынай Нысанбаева. Өмірзақ ауылының тұрғыны жеті бала тәрбиелеп отыр. Перзенттерінің бірі мүгедектігі бойынша есепте тұр.

«Жаңа жыл қарсаңында отбасыларды мерекемен құттықтау біз үшін дәстүрге айналды. Әр үйде мерекелік көңіл-күй орнасын, армандар орындалып, балалар қуансын. Келе жатқан жаңа жылдарыңызбен!», – деп атап өтті қаражанбастықтар.

ҚБМ-ның әр департаменті игі іске үлкен жауапкершілікпен қарады, өйткені балаларға қуаныш сыйлаудан асқан бақыт жоқ.