Өзендік мұнайшыларда өзекті мәселелер жетерлік

«Өзенмұнайгаз» АҚ бас директоры Жәнібек Қайырбекұлы кестеге сәйкес №1,3 МГӨБ еңбек ұжымымен кездесіп, 2018 жылдың қорытынды есептік жиналысын өткізді. Ол еңбекті қорғау жылында жазатайым оқиғаларды болдырмай, барынша қауіпсіздікті сақтай отырып еңбек етуге шақырды.

«Былтыр 5 млн 590 мың тонна мұнай өндіру жоспарланған болатын. Біз 5 млн 480 мың тонна мұнай өндірдік. Жоспардың орындалмауының әртүрлі өзіндік техникалық себептері бар. Жаман көрсеткіш деп есептемеймін. Бұл көрсеткіште әрқайсыңыздың өзіндік үлесіңіз бар", - деді Компания басшысы.

Басқосуда бірқатар өндірістік және әлеуметтік түйткілдер талқыланды. Мысалға басшылық тарап жұмысқа адам алмау жайлы мораторий әлі күшін жоймағанын еске салды. 

Еңбеккерлер де өз мұң-тілегін еркін жеткізді. №3 МГӨБ Скважиналарды жерасты жөндеу бригада операторы Шәріп Ақжігітов жұмыс барысында қыстық арнайы киімнің ыңғайсыздық тудыратынын алға тартса, №1 МГӨБ кәсіподақ төрағасы Ибрагим Сатыбаев кадр жасақтау жайына тоқталып, көпшіліктің көкейіндегін дөп басты. Балалардың жазғы демалысында шетелдегі лагерьлерге де жіберу ұсынысы айтылды. 

МГӨБ топтық қондырғыларындағы слесарьлар операторлармен бірге қоян-қолтық жұмыс жасап жүрсе де, олардан аз жалақы алатындарына қынжылыс білдірді. Скважиналарды жерасты жөндеу және диагностикалау цехының қызметкерлері қазығы қағулы тұрғанына біраз болған асхананың бітпеуіне алаңдаушылығын жасырмады. Үй алуға берілетін қаражаттың мардымсыздығы, білікті мамандардың қызметте өспеуі сынды олқылықтар да ортаға салынды.

Тағы бір назар аударарлық маңызды дүние, 50 жылдық мерейтой қарсаңында Жаңаөзен қаласы жолдарының жеткілікті дәрежеде жөнделмеуіне де мұнайшылар наразы екенін аңғартты, яғни бөлінетін қаржы желге ұшпауға тиіс.

Шара қорытындысында қарапайым еңбек адамдарымен басшылардың сирек жүздесуі осылай мәселелердің қордаланып қалатынына апаратыны уәжделіп, бас директор болса, әзірге шешімін таппай тұрған жайттар бойынша шаралар жоспары әзірленіп, барынша қажетті жұмыстар жүргізілетініне уәде етті деп хабарлайды Компанияның баспасөз қызметі.