«Саламатты Қазақстан» медициналық пойызы Жетісу облысын аралауда

Дәрігерлер алғашқы медициналық-санитарлық көмек көрсетіп, кеңес береді, тексерулер жүргізеді. Қажет болған жағдайда шағын оталар жасалып, нақты мамандармен қамтамасыз етілген емханалары жоқ шалғайдағы кенттердің тұрғындарына жоспарлы емдеуге жатқызуға жолдама беріледі. Пойызда зерттеуге қажетті барлық құрал-жабдық бар.

Науқастарды қабылдау 13.00-14.00 аралығы түскі үзіліспен күнделікті сағат 9-дан 18-ге дейін жүргізіледі. Пойыз 10 мамырда Көксуге жетсе (келу уақыты 23.16), 13 мамырда (08.41) – Қалпеге, 15 мамырда (08.50) – Лепсіге, 17 мамырда (08.15) – Ақтоғайға, 19 мамырда (08.55) – Бескөлге және 20 мамырда (21.24) Достық бекетіне барады.

Пойыздың медициналық тобына терапевт, хирург, жалпы тәжірибе дәрігері, невропатолог, ультрадыбыстық диагностика дәрігері, акушер, зертханашылар, медбикелер, рентгенолог, сәулелік диагностика дәрігері, стоматолог, отоларинголог, психолог, оптометр, гинеколог және уролог кіреді.

Сонымен қатар азаматтарға тиімді психологиялық, құқықтық және медиативтік (татуластыру) көмек көрсететін кәсіби психолог, медиатор және заңгер тартылды. Бұдан басқа, азаматтардың мемлекеттік әлеуметтік қолдау алу құқықтарын қорғау, зейнетақылар, жәрдемақылар, әлеуметтік төлемдер және атаулы әлеуметтік көмек алу мәселелері бойынша тегін кеңестер қарастырылған.

«Саламатты Қазақстан» медициналық пойызының дәрігерлері жобаның басынан бастап осы уақытқа дейін – 13576 адамды тексерістен өткізіп, 133 шағын хирургиялық ота жасаған.

Естеріңізге сала кетейік, жобаны «Самұрық-Қазына» АҚ компаниялар тобының атынан «Samruk-Kazyna Trust» әлеуметтік жобаларды дамыту қоры, Денсаулық сақтау министрлігінің қатысуымен, «Қазақстан темір жолы» ҰК» АҚ – «Әлеуметтік жобалар қоры» корпоративтік қорымен және ақпараттық серіктес - Jibek Joly телеарнасымен бірлесіп жүзеге асыруда.