«Самұрық-Қазына» мен Ashmore Group plc заманауи медициналық орталық жобасын талқылады

«Самұрық-Қазына» АҚ Басқарма төрағасы Нұрлан Жақыпов Ashmore Group plc компаниясының бас директоры Марк Кумбспен кездесті. Кездесу барысында Қазақстанда заманауи медициналық орталық құру жобасының қазіргі жайы талқыланды.

Аталған орталықты салу жоспары 2025 жылы қарашада Қазақстан Президентінің АҚШ-қа сапары аясында жарияланған болатын.

«Біз болашақ клиниканы Қазақстанды жоғары сапалы медициналық қызметтер көрсететін өңірлік хаб ретінде қалыптастырудағы маңызды қадам деп қарастырамыз. Бұл ел азаматтары үшін де, көршілес мемлекеттен келетін емделушілер үшін де маңызды», - деп атап өтті Нұрлан Жақыпов. 

Жобаның құны шамамен 150 млн АҚШ долларын құрайды. Аталған қаражатқа халықаралық премиум санаттағы клиниканы салу, оны пайдалануға беру және басқару жоспарланған.

Ashmore Healthcare International — денсаулық сақтау және оған ұқсас бағыттардағы жобаларға инвестиция салу, оларды басқару және дамыту саласында халықаралық тәжірибесі бар компания. Ол Ashmore Group plc құрамына кіреді, Лондон қор биржасында саудаланатын және FTSE 250 индексіне кіретін британдық инвестициялық холдинг болып табылады.