"Сарыарқа" газ құбырының құрылысына қатысқан отандық компаниялар қандай?

Аталған жоба толығымен жүзеге асқанда, Нұр-Сұлтан, Қарағанды, Теміртау, Жезқазған қалаларының және газ құбырының бойындағы 171 елдімекеннің шамамен 2,7 млн тұрғыны табиғи газға қол жеткізеді.

2018 жылдың желтоқсан айында Елбасының қатысуымен өткен телекөпір барысында газ құбырының құрылысын бастау рәсімі өтті. Ағымдағы жылғы қаңтарда техника мен адамдарды жұмылдыру, наурыз айында газ құбырын дәнекерлеу жұмыстары басталды. Құрылыс барысында 1 мыңнан астам техника және шамамен 2 мың адам жұмысқа тартылды.

Сонымен қатар, құрылыс барысында отандық өндірушілер барынша жұмылдырылды. Бас мердігер – отандық "ҚазҚұрылысСервис" компаниясы. Ілмекті арматура және кран тораптарымен жергілікті өндіруші "Бемер Арматурен Қазақстан" компаниясы, ал автоматтандырылған газ тарату станцияларымен "Батыс Мұнай Газ жабдықтары" компаниялары қамтамасыз етті.

Айтарлықтай қысқа мерзімде 1061,3 километр газ құбыры, 5 бірлік қуатты автоматтандырылған газ тарату станциясы, сондай-ақ газ өлшеу станциясы салынды.

Бұл жұмыстың үйлесімділігін және мамандардың жоғары кәсіби даярлығын, құрылыс барысында пайдаланылған технологиялардың инновациялығын көрсетеді.

Тұтастай алғанда жобаны іске асыру мультипликативті әсер әкелетінін, шағын және орта бизнестің дамуына, жаңа жұмыс орындарының пайда болуына, сондай-ақ газ құбыры бойындағы өңірлердің инфрақұрылымының дамуына серпін беретінін атап өткен маңызды.

Жобаның жүзеге асуы ластаушы заттардың атмосфераға шығарылуын азайтуға мүмкіндік береді, халықтың өмір сүруі үшін неғұрлым қолайлы жағдай жасайды және экологиялық жағдайды жақсартуға ықпал етеді.

Еске сала кетсек, биылғы қазан айының басында, "Самұрық-Қазына" ҰӘҚ" АҚ Басқарма төрағасы Ахметжан Есімовтің және өзге де мүдделі тараптардың қатысуымен, "Сарыарқа" газ құбырының "алтын бөлігі" дәнекерленді.

Астанада, қала әкімдігінің хабарлауынша, жобаның бірінші кезегі ЖЭО-1,2,3, Көктал-1,2, Железнодорожный кенті, Оңтүстік-Шығыс (оң және сол) аудандарына дейін газ тарату желілеріне газ беруді көздейді. 1 кезең аяқталған соң 13,5 мың үйдің тұрғындары газбен қамтылады.

Жобаның екінші кезегі - Мичурино, Интернациональный, Күйгенжар (1-2 ПК), Тельман (3 ПК), Пригородный, Garden Village, Family Village (4 ПК) елді-мекендері газбен қамтылады. Ал үшінші кезекте Ильинка (1-2-ші ДК), Шұбар (3-ші ДК), Өндіріс (4-ші ДК) елді-мекендері газдандырылады.Пайдалануға берілгеннен кейін газ құбыры газ тасымалдауды жүзеге асыруға "Интергаз Орталық Алия" АҚ-на (ИОА) жалға беріледі.