Су тұшыту зауытының құрылысы аяқталуға жақын

Қазір құрылыс-монтаждау жұмыстары 72%-ға аяқталды. ҚСТЗ алаңына қажетті технологиялық жабдық толық жеткізілді. Ғимараттың құрылысы аяқталып, технологиялық желі бойынша негізгі жабдықтар орнатылды. Бұдан бөлек, зауыт ғимаратының төбесі жабылып, контейнерлер ішіне сүзгі материалын орнатып, электр және автоматика кабельдерін тарту жұмыстары жүргізіліп жатыр. Сондай-ақ, болат резервуарлардың құрылысы аяқталып, гидросынақтан сәтті өтті.

«Тамыз-қыркүйек айларында зауытқа 30 вагоннан тұратын 60 контейнер жеткізілді. Барлық материалдар келгеннен кейін жұмыстар жандана түсті. Қазір ғимараттардың негізгі металл құрылымдарын монтаждау аяқталды, қабырғаға және шатырға сэндвич-панельдер орнату, бетон жұмыстарын жүргізе отырып, еденді тегістеу және технологиялық жабдықтарды монтаждау жүргізілуде», – деп атап өтті қосалқы мердігер мекеме өкілдері.

Бұдан бөлек, ПК-1 және ПК-3 іске қосу кешендерінен тұратын сыртқы желілердің құрылысы аяқталды. ПК-1 – бұл жалпы ұзындығы 10,2 км екі сорғы станциясы және құбырлар желісі. Ал ПК-3 құбырының ұзындығы 10,7 км құрайды. Қазір аталмыш нысан бойынша құрылыс аяқталды. Жұмысқа кірісу үшін зауытты іске қосу қажет.

Қабат суын тұшыту зауыты – Маңғыстау облысын сумен қамтамасыз ету мәселесін шешу жолындағы бірегей жоба. ҚСТЗ жылына кемінде 6,2 млн. текше метр Еділ суын босатады. Аталмыш зауыт қабат суын өңдеуге және пайдаға жаратуға, бу айдау әдісімен мұнай өндіретін Қаражанбас кен орнының жұмысын нығайту үшін техникалық сумен жабдықтауға арналған. Өңдеу қуаты – тәулігіне 42 500 текше метр. Ал тәуліктік тұщы су өнімділігі – 17 000 текше метр.

Құрылыс барысын тексерген ҚБМ басшылығы жиналыс өткізіп, жұмыс мерзімі мен жоғары сапа стандарттарын сақтау және іске қосу-реттеу фазасына уақтылы көшу бойынша бірқатар нақты тапсырмалар берді.