Тәуелсіздік құрдасы: «Біз – жаңашыл жастармыз»

Биыл 30 жасқа толатын Арманның мұнай саласындағы еңбек жолы осыдан жеті жыл бұрын басталды. Атырау мұнай және газ университетін бітірген жас маман қызметте өзін кәсіби қырынан көрсете білді. Егемендік арқасында елдегі үздік компаниялардың бірінде сапалы білім мен тәжірибе жинаған тәуелсіздік құрдасы Қазақстан мен мұнай саласының болашағы жарқын екеніне нық сенімді.

«Мен еліміздің дамуына үлес қосып жүргенімді азаматтық парыз деп санаймын. Өйткені, мен жоғары білім алып, елдегі инновациялық өзгерістердің куәгерімін. ҚБМ сияқты мықты мұнай компаниясында жұмыс істейтінімді мақтан тұтамын. Соңғы бір жылдың ішінде біз өз позицияларымызды нығайтуға мүмкіндік берген көптеген өзгерістерді бастан өткердік. Менің жұмысым мұқият болуды талап етеді. Бастысы – шоттармен жұмыс істеу кезінде қателеспеу. Оған қоса мен Тәуелсіздіктің құрдасы ретінде үлкен жауапкершілік сезінемін», – деді Арман.

Арманның жұмысы ҚБМ-ға қызмет көрсететін кредиторлармен тығыз байланысты. Шоттар мен коммуникациялар бойынша, ол нағыз кәсіби маман. Сондай-ақ аға есепші жас мамандар кеңесінің мүшесі. Замандастарымен бірге компанияның әлеуметтік өміріне белсенді араласады. Арманның пікірінше, Тәуелсіздік жылдары туған ұрпақ – алдына мақсат қоюдан және оған жетуден қорықпайтын жалынды да жаңашыл жастар.