Қаражанбас мұнайшысы: Әлі де жоғары межеден көрінетін боламын

- Жүлделі орын алуыңызбен құттықтаймыз. Сайыс Сіз үшін қалай өтті?

- Биыл алғаш рет ҚМГ шеңберіндегі сынға қатыстым. Оның үстіне "Үздік маман" алғаш рет көрші елде өтіп отыр. "Татнефть" өндіріс аумағында сынға түсіп, біліктілігімізді мүмкіндігінше көрсеттік. Шыны керек, жауапты сында аздап қобалжыдым. Дегенмен, барымды салып, аталған сыннан бұйырғаны 3-орын болды.

- «Үздік маман» сайысы Сізге тәжірибе тұрғысынан не берді?

- Жауапты сайыс болғаннан кейін мұнда мен үйренген нәрсе көп болды. Көптеген компанияның мамандарымен пікір алмасып, өндірісте қолданатын технологиясы, жұмыс істеу тәжірибесі туралы пікір алмастық. Білмейтінімізді білдік. Сонымен бірге, «Татнефть» өндіріс базасымен таныстық. Сонда сайысқа түсіп, біліктілігімізді көрсеттік. Айта берсе, мұндай үйретені нәрселер баршылық. Кәсіби шеберлік сайысының бір ұтымды тұсы осы болды.

- Жалпы дайындық қалай жүрді?

- Компания ішінде өткен сыннан өткен соң мүмкіндігіме қарай дайындалдым. Жұмыстан тыс уақытта біліктілігімді тексеріп, дайындықты тұрақты пысықтап отырдым. «Қаражанбасмұнай» АҚ атынан бара жатқан соң жауапкершілікті сезіндім. Барымды салып, сүрінбеуге тырыстым. Алда тағы да қатысып, бағымды сынағым келеді. Бұл сын мен үші мол тәжірибе алаңы болды. Сондықтан, келесі сынға дайындалып, жоғары межеден көрінуді басты мақсат тұтып отырмын.

- «Қаражанбасмұнай» АҚ қай жылдан бері еңбек етесіз?

- 2014 жылы жұмысқа қабылдандым. Содан бері өндірісті автоматтандыру цехындамы жұмыс істеймін. Мамандығым өзіме ұнайды. Сенімге селкеу түсірмеуге тырысып, әрдайым өзімді дамытып, жауапкершілікті сезінемін. Сайысқа дайындық барысында қолдау көрсеткен барша әріптестеріме, цех басшыларына, компания жетекшілігіне шын жүректен алғысымды білдіремін.

- Рахмет! Алдағы белестерді бағындыруда да сәттілік тілейміз!

Жанкелді ҚАРЖАН